Maombi
haya yanatoka (Isaya 1:18, Zaburi 103:12, Isaya 43:25, 41:21, 43:26 na Daniel 9:4-19, Isaya 53:5)
Baba katika jina la Yesu umesema katika Neno lako kwamba; Haya, njoni,
tusemezane, dhambi zetu zijapokuwa nyekundu sana, zitakuwa nyeupe kama theluji;
zijapokuwa nyekundu kama bendera, zitakuwa kama sufu. Umesema pia BABA
yangu kwamba; Kama mashariki ilivyo mbali na magharibi, Ndivyo alivyoweka
dhambi zetu mbali nasi. BABA umemsema wewe, naam, wewe, ndiwe uyafutaye makosa
yangu kwa ajili yako mwenyewe, wala hutazikumbuka dhambi zangu. Na BWANA
umeniagiza kuwa nilete maneno yangu, nitoe hoja zangu zenye nguvu, umesema
mfalme wa Yakobo kwamba nikukumbushe, na tuhojiane; nieleze mambo yangu, nipate
kupewa haki yangu kutoka kwako.
Ninaungama kwako, Ee Bwana, Mungu mkuu, mwenye kutisha, ushikaye
maagano na rehema kwao wakupendao, na kuzishika amri zako; mimi na familia
yangu na ukoo wangu na jamaa zangu na taifa langu tumefanya dhambi, tumefanya
ukaidi, tumetenda maovu, tumeasi, naam, hata kwa kuyaacha maagizo yako na
hukumu zako; wala hatukuwasikiliza watumishi wako, manabii, ambao kwa jina lako
walisema na wakuu wetu, na baba zetu, na watu wote wa nchi. Ee Bwana, haki ina
wewe, lakini kwetu sisi kuna haya ya uso, kama hivi leo; kwa watu wa familia
yangu, na kwa ukoo wangu, tulio katika vifungo vya ibilisi, kwa sababu ya
makosa yetu tulikukosea. Ee Bwana, kwetu sisi kuna haya ya uso, viongozi wa
familia zetu, na viongozi wa ukoo wetu, na baba zetu, kwa sababu tumekutenda
dhambi. Rehema na msamaha ni kwa Bwana Mungu wetu, ingawa tumemwasi; wala
hatukuitii sauti ya Bwana, Mungu wetu, kwa kwenda katika sheria zake,
alizoziweka mbele yetu kwa kinywa cha watumishi wake, manabii. Naam, familia na
ukoo wote wameihalifu sheria yako, kwa kugeuka upande, wasiisikilize sauti
yako; basi kwa hiyo laana imemwagwa juu yetu, kwa sababu tumemtenda dhambi. Basi
Bwana ameyavizia mabaya hayo, ukatuletea; maana Wewe Bwana, Mungu wetu ni
mwenye haki katika kazi zako zote uzitendazo; na sisi hatukuitii sauti yako.
Na sasa, Ee Bwana Mungu wetu, uliyewatoa watu wako hawa katika nchi ya
Misri kwa mkono hodari, ukajipatia sifa, kama ilivyo leo; tumefanya dhambi,
tumetenda maovu. Ee Bwana sawasawa na haki yako yote, nakusihi, hasira yako na
ghadhabu yako zigeuzwe na kuuacha ukoo wangu na familia yangu; maana kwa sababu
ya dhambi zetu, na maovu ya baba zetu, ukoo wangu wamepata kulaumiwa na watu
wote wanaotuzunguka. Basi sasa, Ee Mungu wetu, yasikilize maombi yangu mimi mtumishi
wako, na dua zangu, ukaangazishe uso wako juu ya ukoo na familia yangu palipo
ukiwa, kwa ajili ya Bwana. Ee Mungu wangu, tega sikio lako, ukasikie; fumbua
macho yako ukautazame ukiwa wetu, na mimi mtoto wako ninayeitwa kwa jina lako;
maana hatukutolei maombi yetu kwa sababu ya haki yetu, lakini kwa sababu ya
rehema zako nyingi. Ee Bwana, usikie; Ee Bwana, usamehe; Ee Bwana, usikilize,
ukatende, usikawie; kwa ajili yako wewe, Ee Mungu wangu; kwa sababu mimi na
familia yangu tunaitwa kwa jina lako.
Asante BABA kwani umemtuma Kristo Yesu ambaye alijeruhiwa kwa makosa
yetu, Alichubuliwa kwa maovu yetu; Adhabu ya amani yetu ilikuwa juu yake, Na kwa
kupigwa kwake sisi tumepona katika jina la Yesu Kristo, AMEN!
*Samson Mollel – Uzima wa Milele
International Ministries +255 767 664 338*
_www.uzimawamileleministries.blogspot.com_
