UTANGULIZI
Bwana Yesu apewe sifa
kanisa la Mungu!
Mtu wa Mungu, unajua kuna
wakati mambo katika dunia hii yanaenda vibaya mpaka unadhani kwamba upo peke
yako na hakuna mtu mwingine wa kukusaidia. Kuna wakati unaandamwa na matatizo
na shida nyingi mpaka unakata tamaa kabisa na hauoni kama kuna anayeweza kukusaidia.
Upo wakati katika maisha
ya mwanadamu mambo yanakuwa mabaya hata imani yako inakuwa mashakani, hapa
ndipo pale mtume Paulo anapowaambia Waefeso kwamba “Kwa sababu hiyo twaeni silaha zote za Mungu, mpate kuweza kushindana siku ya uovu, na mkiisha kuyatimiza yote,
kusimama.” (Waefeso 6:13), kumbe
ipo siku ya uovu katika maisha ya mwanadamu ambapo inakubidi uwe umezivaa
silaha za Mungu ili uweze kushindana na kushinda.
Mtume Paulo ametaja hizo
silaha ambazo kimsingi zinatakiwa kuwepo ndani ya mtu yeyote aliyeokoka ambazo
ni ……… kweli viunoni,…………dirii ya haki
kifuani,………. miguu utayari, ……. ngao ya imani,……….. chapeo ya wokovu, na upanga
wa Roho ambao ni neno la Mungu. Katika silaha hizi alizozitaja mtume Paulo
ipo silaha moja inaitwa ngao ya imani;
silaha hii maana yake ni kuamini kwamba vyovyote itakavyokuwa BWANA atatenda
kwakuwa namtumaini yeye.
Mtu wa Mungu ninao
ushuhuda ambao huenda ukakusaidia kwa namna moja katika maisha yako ya kiroho
na ya kimwili kwa habari ya somo hili.
Mwaka 2017 mwezi Mei
niliingia katika changamoto kubwa sana ya maisha katika kipindi cha mwezi mmoja
ambao niliona kama mwaka mmoja. Mke wangu aliugua sana kwani ilifika mahali
hata kusimama mwenyewe hakuweza, mahitaji ya fedha kwaajili ya kuendesha
familia na matibabu yalikuwa makubwa na hapo mke wangu hakuwa na kazi yeyote
kwani kampuni aliyokuwa akifanyia kazi iliuzwa kwa kampuni nyingine na
wafanyakazi wa mikoani wote wakaachishwa kazi, hivyo mshahara wangu pekee ndio
ulikuwa ukitegemewa kwaajili ya mambo yote ya kuendesha maisha hapo nyumbani.
Mwezi huohuo wa Mei, 2017 mwajiri wangu akasimamisha mshahara wangu kwa tuhuma
zisizo na ukweli kwani alinituhumu kutokuwepo kazini. Maisha yangu yalibadilika
ghafla ndani ya siku chache nikajikuta nikilia kama mtoto mdogo asiye na
msaada. Ilifika mahali pamoja na kukopa kwa watu na msaada wa marafiki nilikuwa
sina uhakika wa kesho familia yangu itakula nini.
Lakini mtu wa Mungu
walikuja wana maombi ambao ni rafiki wa familia yangu ilibidi niwaeleze hali
halisi, kwakweli waliomboleza pamoja na mimi kwa kumlilia Mungu na unabii
ukatoka kwamba “tumtegemee Mungu naye
atafanya njia ya kutokea katika jaribu hilo na nisikope tena”. Baada ya
maombi hayo siku ya tatu nilipata posho iliyonilipa vizuri hata kuliko ule
mshahara wangu wa mwezi mmoja uliozuiwa. Nikamwona Mungu kwa viwango vya
kuniinua sana! Ushuhuda huu nimeutoa kwa sehemu kidogo tu ili ujifunze kitu kwa
habari ya kumtegemea Yesu katika magumu unayopitia.
Mtu wa Mungu hayo
yaliyonikuta kumbuka nimeokoka, mke wangu na watoto wameokoka, binti yetu wa
kazi ameokoka, mimi ni mwalimu wa Neno la Mungu; lakini mambo hayo yote ni kama
yalipotea kabisa ndani yangu nikaanza kuona matatizo yamenizidi kuliko ile
neema kubwa ya Kristo Yesu.
(Angalizo: Hapa ninazungumza na mtu aliyempa
Yesu Kristo maisha yake, anayeishi kwa kumtegemea Yesu na asiyeabudu miungu
mingine yaani mtu anayemcha Mungu asiyefuata kawaida ya ulimwengu huu)
Nimekuandalia pointi
kadhaa ambazo zitakupa tafakari na sababu ya kumkabidhi BWANA njia zako na
kumuamini yeye kwa kila jambo kwamba atafanya kama alivyofanya kwangu na
kunivusha atakuvusha na wewe.
UMKABIDHI BWANA NJIA YAKO
Kuna wakati katika maisha
unaona kwamba mwelekeo wako ni kama Mungu hayupo na wewe yaani amekuacha,
lakini Mungu yupo pamoja na wewe ila anataka umtazame yeye peke yake na sio
vile vitu alivyokupa wewe, kwamfano kuna wakati nilitazama mshahara wangu kama
msaada wangu wakati wa shida, Mungu akanionesha kwamba yeye anazo njia nyingi
za kunisaidia zaidi ya kutegemea mshahara; ndio maana tunasoma katika Zaburi 37:5 “Umkabidhi Bwana njia yako, Pia umtumaini, naye atafanya.”
Ninaposema umkabidhi Bwana njia yako ninamaanisha katika kila hali unayopitia
amini kwamba Jehova anajua njia bora zaidi ya ile unayotamani wewe ifunguke. Neno
la Mungu linatufundisha kwamba Bwana anazo njia ambazo ni tofauti na njia zetu Isaya 55:8-9 “8 Maana mawazo yangu si mawazo yenu, wala njia zenu si njia zangu;
asema Bwana. 9 Kwa maana kama vile mbingu zilivyo juu sana kuliko nchi, kadhalika njia zangu zi juu sana kuliko
njia zenu, na mawazo yangu kuliko mawazo yenu.” Ndugu katika Kristo
haijalishi unapitia katika jambo gani, wewe kabidhi njia zako kwa Bwana Yesu
naye atafanya yale ulidhani hayawezekani kwa njia za Mungu yatawezekana na wewe
utavuka pale ulipokwama.
SAFARI YA WANA WA ISRAELI
Safari ya wana wa Israeli
kutoka katika nchi ya Misri kwenda nchi ya ahadi Kaanani ilikuwa na mambo mengi
ambayo tunapaswa kujifunza sasa.
Kwanza nataka ufahamu kwamba
ni kweli kabisa wana wa Israeli walisafiri safari ya kimwili kabisa na
walikutana na changamoto za kimwili kabisa kama wewe na mimi tunavyoishi katika
hali ya mwili na tunakutana na changamoto amabazo nyingine ni za kimwili
kabisa. Vilevile katika safari yao ya kimwili waliongozwa kiroho na Yesu
mwenyewe (alitambulika kama malaika wa Bwana) na walilishwa vitu vya kiroho
(mana).
Mtu wa Mungu fahamu kwamba
kile unachoona katika agano la kale yaani safari ya wana wa Israeli hata sasa
tunaendelea katika safari hiyo lakini kwa jinsi ya rohoni. Neno la Mungu
linatuambia katika Wakolosai 2:16-17 ‘’ 16
Basi, mtu asiwahukumu ninyi katika vyakula au vinywaji, au kwa sababu ya
sikukuu au mwandamo wa mwezi, au sabato; 17 mambo hayo ni kivuli cha mambo
yajayo; bali mwili ni wa Kristo.’’ Pia tunasoma katika Waebrania 10:1a “Basi torati, kwa kuwa ni kivuli cha mema yatakayokuwa, wala si sura
yenyewe ya mambo hayo, …………….”
Kumbe agano la kale ni
kivuli cha agano jipya, yaani agano halisi ni agano jipya na torati (agano la
kale) ni kivuli chake.
Bahari
ya shamu
Tuendelee na safari ya
wana wa Israeli! Wakati Fulani katika safari yao walikutana na bahari ya Shamu
ambapo wao walijua kuwa mwisho wa safari yao umefika hata wakaanza kumlalamikia
Musa na kutamani kama wangebaki Misri; lakini pamoja na kukata kwao tamaa, Musa
alimgeukia Mungu naye Mungu akafanya njia pale walipokuwa wao wameona hakuna
njia tena.
Tunasoma kitabu cha Kutoka 14:11-22 “11 Wakamwambia Musa, Je! Kwa sababu hapakuwa na makaburi katika Misri
umetutoa huko ili tufe jangwani? Mbona umetutendea haya, kututoa katika nchi ya
Misri? …………….13 Musa akawaambia watu, Msiogope, simameni tu, mkauone wokovu wa
Bwana atakaowafanyia leo; kwa maana hao Wamisri mliowaona leo hamtawaona tena
milele. 14 Bwana atawapigania ninyi, nanyi mtanyamaza kimya……………………………21 Musa;
akanyosha mkono wake juu ya bahari; Bwana akaifanya bahari irudi nyuma kwa
upepo wa nguvu utokao mashariki, usiku kucha, akaifanya bahari kuwa nchi kavu,
maji yakagawanyika. 22 Wana wa Israeli wakaenda ndani kati ya bahari katika
nchi kavu; nayo maji yalikuwa ukuta kwao mkono wa kuume, na mkono wa kushoto.”
Mtu wa Mungu hebu jipe
muda utafakari katika hali ya kawaida umekutana na bahari na unataka kwenda
upande wa pili wa bahari, unadhani kama hauna boti au nyenzo ya kukuvusha na
mali zako zote utafanyaje? Mwangalie Yesu kwani ni kazi yake kukuvusha na wewe
ni kazi yako kuamuamini Bwana Yesu.
Inawezekana upo sehemu
umekata tama kama wana wa Israeli, mwangalie Jehova kwani yeye anazo njia
ambazo ni juu sana ya fikra zetu naye atatuvusha, atakuvusha kwenye mkwamo wa
magonjwa, uchumi, ndoa, kazi biashara.
Maji ya
kunywa jangwani
Changamoto katika safari
ya wana wa Israeli haikuishia hapo, walipofika mahali panaitwa Mara (kwasababu
maji ya mahali pale yalikuwa machungu)
Neno la Mungu linatuambia “22 Musa
akawaongoza Israeli waende mbele kutoka Bahari ya Shamu, nao wakatokea kwa
jangwa la Shuri; wakaenda safari ya siku tatu jangwani wasione maji. 23
Walipofika mahali palipoitwa Mara hawakupata kuyanywa yale maji ya Mara, kwa
kuwa yalikuwa machungu; kwa ajili ya hayo jina lake likaitwa Mara. 24 Ndipo
watu wakamnung'unikia Musa, wakisema, Tunywe nini?” Kutoka 15:22-24
Kitu ninachotaka nikuoneshe
hapa ni kwamba wana wa Israeli bado walikuwa hawamwamini Mungu aliyewavusha
katika bahari ya shamu, bado walikuwa na wasiwasi na Jehova, jambo hili
lilipelekea changamoto nyingi kuinuka katika safari yao. Sikiliza
nikufahamishe, Mungu anataka watu wanaomuamini na kumtegemea yeye pekee,
ukimtilia shaka Mungu anaona kwamba unamdharau kama ilivyotokea kwa wana wa
Israeli (Hesabu 14:11,23 “11 Bwana akamwuliza Musa, Je! Watu hawa
watanidharau hata lini? Wasiniamini hata lini? Nijapokuwa nimefanya ishara hizo
zote kati yao……. 23 hakika yangu hawataiona hiyo nchi niliyowaapia baba zao,
wala katika hao wote walionidharau hapana atakayeiona;.”) Kumbe kwa
kumtilia shaka Mungu Jehova wana wa Israeli wote walioona shaka hawakuweza
kuingia ile nchi ya ahadi.
Ukiendelea kusoma maandiko
utagundua kuwa wana wa Israeli waliendelea kukutana na changamoto ya kukosa
maji mara kwa mara na hii ilitokea ili waweze kuamini kwamba Mungu ndiye
anayeweza kuwasaidia na sio mwanadamu (Kutoka
17:3-4, Hesabu 20:3-5).
Napenda ufahamu kuwa,
ikiwa utakuwa na shakashaka juu ya ukuu wa Mungu kukuvusha katika eneo lenye
changamoto katika maisha yako basi uwe na uhakika kwamba maisha yako katika
eneo hilo yatakuwa na changamoto kila wakati mpaka utakapoamua kumuamini Mungu
na kumkabidhi njia zako. Mkabidhi Bwana Yesu njia zako naye atakuvusha pale
kwenye changamoto.
MKONO WA BWANA HAUSHINDWI KUKUSAIDIA
Ikiwa umemkubali Yesu kuwa
ni Bwana na mwokozi wa maisha yako, nawe unaamini kwamba damu ya Yesu
imekukomboa, basi kabidhi njia zako kwa Bwana Yesu naye atakutendea mambo
makubwa sawa na Neno lake kutoka Isaya
59:1 “Tazama, mkono wa Bwana
haukupunguka, hata usiweze kuokoa wala sikio lake si zito, hata lisiweze
kusikia;”
Yesu mwenye amesema katika
injili ya Mathayo 7:11 “Basi ikiwa ninyi, mlio waovu, mnajua kuwapa
watoto wenu vipawa vyema, je! Si zaidi
sana Baba yenu aliye mbinguni atawapa mema wao wamwombao?”
Ukimkabidhi Yesu njia zako
halafu umwamini kwamba atakutendea jambo hilo basi uwe na uhakika kwamba atafanya kwa utukufu wa jina
lake.
Yesu anatoa mfano wa wewe
na mimi jinsi unavyoweza kuwajali watoto wako na kuwatunza ili wasitindikiwe na
unafanya hivyo pamoja na mapungufu yako ya kibinadamu, Yesu anasema kama wewe
unaweza kufanya hivyo katika hali yako ya uovu, je? Baba wa mbinguni si
atafanya na kuzidi?
Mtu wa Mungu mkabidhi
Bwana njia zako, haijalishi unapitia jambo gani, mkabidhi Bwana njia zako na
umwamini naye atafanya.
